Madaxweyne, Diiwaan-gelinta Hantidu, Waxay ka Bilaabantaa, Adiga Iyo Ku-xigeenkaaga?.
Madaxweyne, Diiwaan-gelinta Hantidu, Waxay ka Bilaabantaa, Adiga Iyo Ku-xigeenkaaga?.
Hargeysa(Xogreebnews)-Madaxweynaha
Jamhuuriyadda Somaliland Muuse Biixi Cabdi, waxa golaha Xukuumadiisa cusub uu
faray inay diiwaangeliyan Hantida guurtada iyo ma guurtada ah ee ay gaarka u
leeyihiin, iyo sidoo kale, inay soo gudbiyan xogahooda shaqsi.
Tallaabadan ugubka ah
ee Madaxweyne Muuse Biixi ku gar-daadiyey golaha Xukuumadiisa cusub, waxay
abuurtay dood iyo su’aalo kala duwan oo bulshaddu ku falanqaynayan dhacdadan iyo
habkan ka wanaagsan oo Madaxweynaha uga haboonan lahaa inuu u maro arrinkan. Tusaale
ahaan shaqsiyaadka walaaca ka muujiyey hab-raaca Madaxweynuhuu ku wajahay
sheekadan xiisa leh, waxay farta ku fiiqeen inay habooneyd madaxweynuhuu kolkii
uu hawsha bilaabayey inuu Geel duqbaa loo tu’iyaayee badka soo dhigo guurtada
iyo ma guurtada hantida uu gaarka u leeyahay, kadibna ku xigsiiyo Madaxweyne
ku-xigeenkiisa Md. Cabdiraxmaan Cabdilahi Ismaacil Saylici, dabeedna kolkaas ayey
xidhmi lahayd Sheekada hantida Wasiiraddiisu.
Iyaddoo weliba Madaxweynaha
cusub waajib Dastuuri ah ku tahay inuu diiwaangeliyo hantidiisa gaarka ah,
isagga iyo ku-xigeenkiisaba, sida uu dhigay Qodobka 82aad ee Dasuurka qaranku
farqadiisa oo u dhigan sidan; "..Qodobka 82aad Shuruudaha Qofka Loo
Dooranayo Madaxweyne Ama Madaxaweyne-Ku-Xigeen, f, 9-aad Waa inuu hantidiisa diiwaan geliyo..”.
Sidaas awgeed, dadka
aragtidan qaba, waxay xuseen inaanay tallaabadani ahayn mid ka go’an
Madaxweynaha, balse ciiro isku qarin iyo arrin uu ka leeyahay ujeeddo
siyaasadeed oo weliba aan ka foggayn is dhul-dhigis uu rabo inuu bulshada ku
xod-xoto bilowga Xukuumadiisa. Dhacdadan ayaa hadal-haynteedu waxa kaloo ay la
kowsatay ama dibeda usoo saartay tusaalaha hoggaaminta iyo cadaaladda Muuse
Biixi, maadaama oo ay jiraan hanti qaran iyo mid gaar ah, oo laala xidhiidhiyo
Madaxweynaha cusub inuu sharci darro iyo xoog ku hayso.
Leave a comment |
|
Madaxweyne, Diiwaan-gelinta Hantidu, Waxay ka Bilaabantaa, Adiga Iyo Ku-xigeenkaaga?.
Madaxweyne, Diiwaan-gelinta Hantidu, Waxay ka Bilaabantaa, Adiga Iyo Ku-xigeenkaaga?.